CEBU, Philippines – Aron makabotar ang mga priso sa umaabot nga Barangay ug Sangguniang Kabataan elections karong Mayo kinahanglan adunay kamandoan nga gikan sa korte nga nagtugot kanila nga makabotar sa ilang barangay.
Matud ni Atty. Ferdinand Gujilde ang provincial election officer nga sa umaabot nga piniliay sa barangay walay voting precinct nga ibutang sa mga prisohan.
“Na TRO (temporary restraining order) na sa Supreme court so gihunong sa Comelec. Makabotar lang karon ang mga piniriso kon duna silay court order allowing them to vote,” matud ni Gujilde.
Matud niya nga walay hurisdiksyon ang Comelec sa mga priso ug ang korte ra maoy makabuot.
Usa sa gikonsiderar niini mao ang seguridad sa mga priso. Kon tugotan silang makabotar kinahanglan silang kuyogan og jailguard sa polling place kon asa siya narehistro.
Sa pikas bahin, gipahimangnoan sa Comelec ang mga botante nga bawal gyud mag-selfie o mokuha og hulagway sa mga polling areas ilabi na ang pagkuha og hulagway sa ilang balota.
“Ang botante dili pwede magdala og camera inside the polling place. Not only nga dili ka pwede magdala, dili pud ka pwede mogamit,” matud ni Gujilde kay usa kini ka kalapasan sa Omnibus Election Code.
Matud sa election officer nga hinoon kung mogawas na ang botante gikan sa polling place ug ibutyag niini kung kinsa ang iyang gibotaran wala nay malapas niini nga balaod sa eleksyon.(/IBM)(BANAT NEWS)