Kandidato nga nalambigit sa druga dili hinganlan

CEBU, Philippines – Dili mohingan ang Philippine Drug Enforcement Agency sa mga opisyal sa barangay ug sa mga kandidato sa piniliay nga giingong nalambigit sa ginadiling drugas.

Matud ni Konsehal David Tumulak, deputy mayor for police matters, nga dili mapugos ang PDEA sa paghatag og mga pangan kun way lista nga gipakanaug ug nga dunay kompirmasyon sa kapolisan.

Gihangyo ni Tumulak ang mga botante sa matag barangay nga sutaon gyud pag-ayo ang mga kandidato kun wala ba kini ilegal nga mga binuhatan. Dili usab sila angayan mahadlok gumikan kay sekreto man ang ilang pagbotar.

Kun adunay kalambigitan ang kandidato sa ilegal nga kalihukan angayan lang nga dili botaran aron dili magpadayon ang dautang binuhatan kun modaug.

Samtang nakadawat usab og report si Tumulak nga dunay duha ka kandidato sa south district nga may kalambigitan sa ginadiling drugas. Ang maong lista gikan mismo sa mga molupyo sa wala hinganli nga barangay ug gikompirmar usab kini sa kapolisan.

Dili hinoon pusher apan modawat og donasyon gikan sa mga giilang pusher sa ilang barangay.

Ang duha ka kandidato sa umaabot eleksiyon sa barangay nitabang sa kapolisan sa kampanya batok sa ginadiling drugas pinaagi sa pagsumbong ngadto sa kapolisan sa mga drug pushers apan walay labot sa sumbong ang mga pusher nga nitabang kanila.

Nagkanayon si Tumulak nga mas maayo kun hinganlan ang naasoy nga mga kandidato aron makahatag sila og rason kabahin niini.

"So kay nigawas man ilang pangan, sila ra say makalimpyo sa ilang pangan," matud ni Tumulak.

Giangkon ni Tumulak nga dili ikalimod nga dunay mga opisyal sa barangay ang mag-solicit og kwarta sa mga ilegalista sa barangay hinungdan nga tuohan silang protektor.

"As a public servant di sila magpakita diha (tigbakayan) kay naa may mandate sa gobiyerno sa ilang responsibility," matud ni Tumulak.

Si Tumulak nagkanayon usab nga kinahanglan dili malambigit sa ilegal nga binuhatan ang mga opisyal sa barangay ug sa gobiyerno nga supak sa balaud.

Hinabion pa hinoon niya ang duha ka kandidato aron pagklaro kung unsa ka tinuod ang maong isyu. (CNU Intern ug Bernardette Itang, PIT Intern/GMR)(BANAT NEWS)