CEBU, Philippines — Ang mga dagkong building ug mga commercial establishments sa Dakbayan sa Sugbo susihon sa mga kawani sa Office of the Building Officials (OBO) kay dunay report nga daghan ang wala na magmentinar og fire exits.
Si Konsehal Jerry Guardo, deputy mayor for infrastructure, miingon nga mahinungdanon kaayo nga ang mga dagko ug tag-as nga building, ilabi na ang mga commercial establishments, nga duna gyu’y mga fire escape/exits aron magamit kon may emerhensya sama sa sunog.
Matud ni Guardo nga nakadawat siya og impormasyon nga usa ka balay patigayon nga anaa duol sa Basilica del Santo Niño gitabonan ang ilang fire exit nga anaa mahimutang habig sa dalan D. Jakosalem.
Ang maong balay patigayon nasakpan sa mga fire inspector kaniadto nga walay fire exit dihang gisusi ang maong tindahan human masunog ang ilang branch store sa Dakbayan sa Ormoc.
Ang konseho sa Dakbayan sa Sugbo nipasar sa resolusyon ni Guardo ug niawhag sa kadagkoan sa OBO nga gidumala ni Engr. Josefa Ylanan sa pagsumiter kanila og report sa ilang pakisusi.
Si Guardo niingon nga apil sa iyang ipasusi ang report nga ang ubang building adunay hagdan nga puthaw nga kabahin sa ilang fire exit apan kuyaw na kaayo agian kay gabok na kaayo tungod sa taya.
Ang Fire Code of the Philippines naglatid nga ang pultahan paingon sa fire escape/exit kinahanglan nga dili kandaduhan ug ang trangka niini kinahanglang maabli ra pinaagi sa pagduso aron magamit dayon sa dinalian nga panginahanglan.
Gilatid usab nga ang mga building dunay emergency lights nga mosiga dayon sa higayon nga mapawong ang kuryente ug mogiya kini sa katawhan sa nahimutangan sa mga fire exits. (BANAT NEWS)