CEBU, Philippines — Wala na tugoti pa nga makamaneho ug gi- ban na sulod sa Cebu South Bus Terminal (CSBT) ang pito ka mga drayber ug konduktor nga nagposotibo sa drug test.
Matud ni Jonathan "Joy" Tumulak ang security management head sa CSBT nga sayo sa bulan sa Marso mismo ang mga bus operators maoy nipahigayon og drug test sa ilang mga tawo.
"Ang mga bus operators gyud mismo nigasto unya sila pud mismo ni initiate pagpa drug test sa ilang mga personnel. So, ang tanan naka submit sa ilang report (ngadto sa CSBT)," matud ni Tumulak. Dili momenus 300 ka mga personnel gikan sa 24 ka bus ug minibus operators ang gipaubos sa drug test ug pito ang nagpositibo.
"Ban sila diri terminal, wala na namo sila gi-allow pagsulod except og mosakay sila as pasahero," matud ni Tumulak.
Sumala ni Tumulak nga ang pagpaubos kanila sa drug test pamaagi kini pagsiguro nga luwas ang biyahe sa mga pasahero hilabina karon Semana Santa. (IBM) (BANAT NEWS)