4 pushers nadakpan
CEBU, Philippines — Nadakpan ang upat ka gikatahapang pusher og shabu sa managlahing buy-bust operation sa kapolisan sa Lungsod sa Liloan ug Dakbayan sa Lapu-Lapu.
Si Supt. Randy Korret, hepe sa Liloan Police Station, niila sa nadakpan nga si Gilbert Cabig, 49, taga Barangay Poblacion.
Usa ka semana nga gipanid-an ang suspek sa wala pa gilusad ang operasyon nga niresulta sa pagkasakmit sa unom ka gagmay nga pakete sa shabu.
Samtang ang mga sakop sa City Intelligence Branch sa Lapu-Lapu City Police Office ang nakadakop sab og duha ka gikatahapang pushers.
Giila sa hepe sa CIP, Chief Inspector Mark Gifter Sucalit, ang mga nadakpan nga sila si Jubert Bualan San Juan, 21, taga Cambiohan, Marigondon ug Raymond Patinga Pepito, 29, kinsa nasakmitan og siyam ka gagmay nga pakete sa shabu.
Laing nadakpan mao si Lucris Alkuino Cosep, 32, taga Ibabao, Agus sa maong dakbayan ug nasakmit gikan kaniya ang siyam ka gagmay nga pakete sa shabu. (Romeo T. Limpangog/GMR)
P60 mil danyos sa sunog sa Quiot
Nikabat sa P60 mil ang danyos sa sunog nga niulbo kagahapon sa buntag sa Sitio Greenbelt, Barangay Quiot, Dakbayan sa Sugbo.
Nadawat sa kabomberohan ang alarma sa sunog alas 10:11 ug nakontrolar alas 10:24 sa buntag ug giisa lang nila sa first alarm.
Ang sunog nagsugod sa panimalay ni Nadi Tabar diha mismo sa kwarto sa iyang anak.
Matud ni Senior Fire Officer 2 Dionisio Regasa, fire investigator sa Cebu City Fire Station, nga electrical misuse ang ilang nalantawan nga hinungdan sa sunog apan ila pa ipatawag ang tag-iya sa panimalay.
Sumala pa ni Regasa nga tulo ka panimalay ang hingpit nga naugdaw ug gibana-bana hinoon wala’y gikataho nga tawo nga naangol sa maong sunog.
Ang Bureau of Fire Protection-7 mohimo og rekoreda karon aron paglikay sa sunog ilabi na nga daghan ang mobakasyon panahon sa Semana Santa. (GMR) (BANAT NEWS)
- Latest
