Divorce Bill di lang para sa mga adunahan

CEBU, Philippines — Ang Divorce Bill nga giaprubahan sa House of Representatives sa miaging semana matud pa dili lang para sa mga adunahan apan para usab kini sa mga kabus nga buot molingkawas sa kaminyoon nga wala na gyu’y paglaum nga molungtad og dugay.

Matud pa ni Rep. Gwendolyn Garcia sa ikatulong distrito sa Cebu ug usa sa mga principal authors sa maong balaudnon ang Divorce Bill usa kini ka “option” nga ihatag sa estado ngadto sa iyang nga konstituwente nga buot molingkawas sa kaminyoon nga dili na gyud  masalbar.

“The reality is, some marriages does not work,” matud pa ni Garcia.

Ang Pilipinas ug ang Vatican na lang ang mga Katoliko nga nasud sa tibuok kalibutan nga wala magtugot og divorce, apan nakita nga sa napulo ka mga nasud nga adunay diborsiyo menus hinuon ang gidaghanon sa nag-diborsiyo.

“Ang divorce diri sa Pilipinas maghatag lang kini og opsyon dili kay ang State mismo ang moawhag sa mga magtiayon nga pag- divorce mo,” matud pa ni Garcia.

Sumala pa niya ang mga batang magsige og makakita sa ilang ginikanan nga magsige og away maapektaran ang pagdako.

Si Deputy Speaker Pia Cayetano miingon nga sa mga kaubanang senador na lang niya gisalig ang Divorce Bill apan siya nanghinaut nga paminawon sa mga magbabalaod ang tingog sa katawhan.

Si Cayetano nibisita sa University of San Carlos  kagahapon alang sa kalihukan sa Glory Reborn nga kampanya batok maternal mortality nga gisugdan pa niadtong tuig 2003.

Gituki ni Cayetano, kung unsay gihimo sa gobiyerno aron mahunong kining mga pagkamatay sa mga mabdos ug mga inahang bag-ong nanganak. (IBM) (BANAT NEWS)