Rama ug Duterte nagkasultihanay na
CEBU, Philippines — Nagkatagbo na gyud sila si kanhi Cebu City Mayor Michael Rama ug si Presidente Rodrigo Duterte nga mitumbok kaniya nga drug protector ug iya na kini nga giingnan nga dili tinuod nga nalambigit siya sa drugas.
Hinoon, wala maniguro si Rama nga iyang nakumbinser si Duterte aron wad-on ang iyang ngalan sa listahan sa mga tawo nga gipasanginlang nalambigit sa gidiling drugas. Kaduha ka higayon nga ang ngalan ni Rama gilitok kaniadto ni Duterte atol nga naghisgot kini sa mga tawo nga giingong target karon sa kampanya sa kagamhanan pagsumpo sa gidiling drugas.
Si Rama miadto sa Davao kaniadtong Biyernes sa miaging semana kay adunay convention ang Rotary Club of Cebu Guadalupe nga siya maoy presidente.
Matud ni Rama nga gitabangan siya ni Presidential Special Assistant Bong Go aron nga magkahinabi sila si Duterte bisan sa hamubo lang nga higayon.
Wala gyud motug-an si Rama sa tanan nilang gipanagsultihan ni Duterte, apan matud niya nga migaan karon ang iyang dughan kay naestorya na gyud niya ang presidente.
Naglaum gyud si Rama nga unta tangtangon na ni Duterte ang iyang ngalan sa listahan sa mga drug protectors kay dili gayud tinuod nga siya nagproteher og druglord.
Gibalikbalik ni Rama nga siya ug ang iyang pamilya nauwawan gyud kaayo tungod sa mao nga pasangil nga gihulagway niya nga walay basehanan.
Diha nga gisukna si Rama kon mapahiyumon ba ang presidente nga nakighinabi kaniya, ang kanhi mayor sa dakbayan sa Sugbo miingon nga makuli nimo nga makitang magpahiyom si Duterte.
Gisukna usab si Rama sa Banat News kon apil ba sa ilang gihisgotan ni Duterte ang kabahin sa nagsingabot nga eleksiyon karong sunod tuig, apan matud ni Rama nga wala kini maapil sa ilang giestoryahan.
Gusto ni Rama nga si Duterte lang ang mobutyag sa mga isyu nga ilang gipanagsultihan kay morespeto siya sa presidente. (BANAT NEWS)
- Latest