Kontraktor sa Balamban PH, Kapitolyo magpirmahay
CEBU, Philippines — Nihimo og “compromised agreement” ang Kapitolyo ug kontraktor sa Cebu Provincial Hospital – Balamban aron hingpit na nga ma-turnover ang building ngadto sa Kapitolyo.
Ang Kapitolyo wala mobayad sa P540 milyones nga bayranan ngadto sa mga contractors sa nagkadaiyang proyekto ug programa niini tungod kay giingong ilegal kini sumala sa Commission on Audit (COA).
Ang 58 ka infrastructure projects gikan sa tuig 2008 ug 2011 giingong wala kini moagi sa approval sa hunta probinsiyal.
Apil sa maong infrastructure projects ang P58.3 milyones sa pagtukod sa provincial hospital sa Balamban.
Si Gobernador Hilario Davide III nagkanayon nga importante ang maong tambalanan ilabi na nga numero uno sa five-point agenda sa iyang administrasyon ang health services.
“I instructed Atty. Mark Tolentino (provincial administrator) to see the contractor kun unsay atong himoon ana. Willing man sad ang contractor to open,” matud ni Davide.
Ang “compromised agreement” kabahin kini sa bayranan sa Kapitolyo sa maong building.
Gitataw sa gobernador nga kun unsa may kasabutan nga maabot sa Kapitolyo ug sa kontraktor, iagi kini sa approval sa Provincial Board.
Sa pagkakaron, ang ground floor pa lang sa CPH- Balamban ang gigamit sanglit kuwang pa og mga higdaanan ug uban pang ekipo ug pasilidad ang second ug third floors.
Nanghinaut si Davide nga karong tuiga masugdan ang pag-okupar sa nahabilin nga duha ka andana ilabi na kun hingpit na ma-turn over sa Kapitolyo ang maong building. (BANAT NEWS)
- Latest
