Bana nga sugarol gipadakop sa asawa
CEBU, Philippines — Usa ka bana giunay og padakop sa asawa human kini iyang gisugo og sud-an alang sa ilang paniudto apan mihapit sa hantakan niadtong Domingo diha sa Sitio Isla Verde, Barangay San Isidro, dakbayan sa Talisay.
Si Superintendent Marlu Conag pangulo sa kapolisan sa maong siyudad niingon nga nangunay gyud siya sa pagdakop sa mga naghantak gumikan sa iyang pagkatandog sa sumbong sa usa ka asawa kaniya nga ang iyang bana nga gisugo sa pagpalit og sud-an aron paniudto wala na mabalik kay nihapit sa hantakan.
Gibutyag ni Conag nga personal nga nisumbong kaniya ang maong babaye hinungdan nga gisulod nila ang nahisgutang lugar.
Sila si Ramel Tanghiyan, 26-anyos ug Michael Duazo, 32 ang nadakpan apan ang uban nga kauban nilang naghantak nakadagan.
Sa laing bahin, usa ka mole-mole ug video karera ang gisakmit usab sa mga polis didto sa Sitio Mahayahay, Barangay Cansojong sa nahisgutang siyudad.
Girespondehan usab sa kapolisan ang sumbong nga adunay nagtigbakay diha sa Sitio Crossing, Barangay Campo 4 bisan pa og piyesta sa maong lugar.
Nasikop sila si Benjamin Rico, 37-anyos, Apolonio Radana, 51 ug Jocleciano Abastas, 35.
Ang maong mga dinakpan nagtingkagol diha sa Talisay City Police Station detention cell ug gikatakdang pasakaan og kaso sa nahimo nilang kalapasan. (BANAT NEWS)
- Latest
