Labella mao nay president sa PDP-Laban sa Cebu City

CEBU, Philippines — Nahingpit na ang appointment ni Cebu City Vice Mayor Edgardo Labella isip Partido ng Demokratikong Pilipino-Laban (PDP-Laban) Cebu City Council President.

Kini human si Senador Aquilino “Koko” Pimentel PDP-Laban National President uban sa National Secretary General, House Speaker Pantaleon Alvarez ug Vice Chairman Sec. Alfonso Cusi mipirma sa appointment papers ni Labella penetsahan og Pebrero 26, 2018.

Si Konsehal Raymond Garcia nga kaalyado sa PDP-Laban mi-post sa dokumento sa iyang Facebook account nga si Labella opisyal na nga gitudlo isip PDP-Laban Cebu City Council President.

Si Garcia miingon nakadesisyon siya nga i-post kini sa iyahang account aron paghatag og katin-awan nga si Labella mao na ang Presidente sa PDP-Laban Cebu City Council.

Ang membership ug ang sayong appointment ni Labella isip Presidente sa PDP-Laban Cebu City Chapter nahimong isyu human ang existing officers wala niila kaniya tungod kay wala maka-comply sa Basic Membership Seminar.

Niadtong Enero 27, si Labella nanumpa kang Alvarez sa Malacañang human gitudlo nga PDP-Laban City Chapter President.

Matud ni Garcia nga natunong lang nga nakakuha siya og kopya sa appointment papers ni Labella niadtong adlaw’ng Biyernes tungod kay naa siya sa Manila sa miaging semana kay mitambong og importanteng kalihukan.

Karon nga ang designation ni Labella na-formalized na, si Garcia mitataw nga wala kini nagpasabot nga dili niya ilhon ang kanhi presidente nga si Lorna Bacalla.

Gani si Garcia uban sa mga opisyales nga miyembro sa Barug-PDP Laban gusto makigtrabaho kang Bacalla.

“We are a stronger party together kaysa magbuwag-buwag ta, so we are extending our hand reaching out to them and to further the agenda of the president and of PDP-Laban which are federalism, anti-corruption and anti-drugs, together we are stronger group,” ni Garcia pa.

Si Bacalla sa iyang bahin miingon wala pa niya nadawat ang appointment papers ni Labella ug mangutana siya sa national headquarter labot niini.

Dihang gipangutana kini kon andam kini makigtrabaho sa bag-ong gitudlo nga presidente, matud niya “Wala mi problema niana.”

Gisuwayan og kuha ang habig ni Labella pinaagi sa text ug pagtawag apan walay tubag nga nadawat. (BANAT NEWS)