CEBU, Philippines — Patay ang usa ka welder sa construction site nga iyang gitrabahoan diha sa Purok O6B, Sitio Laray, Barangay Nangka, Lungsod sa Consolacion human matud pa gidudahang misuway pagkuryente sa mga isda diha sa lim-aw nga tubig sa maong dapit.
Si Police Officer 2 Jose Aaron Ortega, desk officer sa Consolacion Police Station miila sa namatay mao si Roger Loquillano Garcia, 40, lumad nga taga Baybay, Leyte. Matud pa ni Ortega alas 8 pa sa buntag nibiya sa iyang gipuy-an niadtong Huwebes si Garcia ug miadto sa lim-aw ug wa na mabalik. Pasado alas 4 na sa hapon dihang nakit-an kini sa mga tawo nga naglutaw sa lim-aw ug wa nay kinabuhi. Si Ortega miingon nga dako ang ilang pagtuo nga wala matarong sa paggamit ni Garcia ang gidala niining panguryente sa isda mao nga naunay kini niini. IBM (BANAT NEWS)