CEBU, Philippines — Niabot og 160 ka representante sa mga contractors sa Sugbo ang nisalmot sa tigum sa Department of Labor and Employment-7 sa niaging adlaw. Usa sa mga gituki ang kaluwasan sa mga construction workers ilabi na sa mga bunkhouse nga puy-anan ug uban pa.
Matud ni Engr. Vicente Abordo, pangulo sa Technical Support Services Division sa DOLE-7, nga human sa nahitabong pagkahugno sa bunkhouse sa Abraham Lee Construction nga nikalas og lima ka kinabuhi ug niangol og dili mominus 50 ka construction workers, gilakip na nila karon pagsusi sa ilang mga inspectors ang tanang construction companies nga adunay bunkhouse.
Sumala pa ni Abordo nga pipila sa mga contractors ang nisugyot nga dili maayo ang klase sa bunkhouse nga nahugno ug mas maayo gamiton ang mga container vans aron maseguro nga luwas ang mga trabahante sa higayon nga sila mamahuway na.
Gipahinumduman sab sa taga DOLE-7 nga kinahanglan seguruhon sa mga contractors nga adunay insaktong pansayan ug well-ventilated ang lugar nga kapahuwayan sa mga construction workers.
Ang acting director sa DOLE-7, Cyril Ticao, nitug-an nga giseguro usab nila sa ahensiya ang kaluwasan, health matters ug nasunod ba sa mga contractors ang sakto nga sweldo sa ilang mga trabahante. (BANAT NEWS)