Parokya misugot paagian ilang lugar aron maibanan ang traffic

CEBU, Philippines — Misanong sa hangyo sa kagamhanan sa siyudad sa Sugbo ang Archdiocese Shrine of Our Lady of Lourdes Parish nga kon mahimo makaagi sa ilang tugkaran ang mga sakyanan aron makatabang nga maluag-luagan ang kahuot sa trapiko dili lang sa E. Sabellano Street apan lakip na sa F. Llamas Street ug Natalio Bacalso Avenue.

Si Konsehal Dave Tumulak, chairman sa Committee on Public Order and Safety nagkanayon tungod sa kahuot sa trapiko sa dalan E. Sabellano pipila sa mga motorista adto moagi sa N. Bacalso Avenue. Nagpasalamat kanila ang konsehal aron makaagi ang mga sakyanan gikan sa E. Sabellano Street paingon sa Ganciang Street ug N. Bacalso.

Apan dili tugotan ang mga motorsiklo sa maong dapit ug dili usab mogamit og busina diha sa compound sa simbahan.

Gikan sa alas-6 hangtud na sa alas-10 sa buntag ug alas 4 sa hapon hangtod na sa alas 9 sa gabii, gikan sa adlaw’ng Lunes hangtud sa Biyernes mahimong makaagi didto.

Si Cebu City Mayor Tomas Osmeña nalipay ug nagpasalamat sa gihimo sa simbahan kay dako kini og tabang sa traffic situation sa dapit.

Sa laing bahin, gisugdan na pagtaud ang unang hugna nga pagpasuga sa Cebu South Coastal Road sa taga Engineering Department sa Siyudad sa Talisay kagahapon.

Ang siyudad gisaway diha sa social media tungod sa kadugay na sa panahon nga way suga ang maong lugar.

Si City Engineer Gamaliel Vicente Jr. nibutyag nga niadtong Lunes naabot ang 90 ka LED lights nga itaud diha sugod sa taytayan padung sa City Hall lahos na sa Barangay Lawaan 1.  Aduna pa sila’y dugang gipaabot nga 280 ka mga LED nga suga aron lukpon sa pagtaud ang CSCR. (BANAT NEWS)