CEBU, Philippines — Ang Department of Agriculture-7 mopahigayon og Farmers’ Rice Outlet adto sa Maguikay, Mandaue ugmang adlawa.
Matud pa ni DA-7 regional director Salvador Diputado ang aktibidad gihimo alang sa selebrasyon sa Women’s Month ug sa pagbaligya og mas baratong bugas ngadto sa mga kunsomidor.
Nagkanayon si Diputado nga ang maong bugas produkto sa mga mag-uuma sa Bohol nga gigaling sa Rice Processing Center sa Pilar, Bohol nga gidumala sa Bohol Federation of Farmer’s Cooperative.
Ang mapalit nga bugas “undermilled rice” (ka usa ra gigaling) nga tag P38.00 matag kilo, regular milled rice tag P42.00 matag kilo ug premium milled rice tag P46.00 ang kilo.
Mapalit ang maong mga bugas sulod sa duha ug lima ka kilo matag putos.
Dugang pa ni Diputado nga kung magmalampuson ang maong tinguha, himoon ang Farmers’ Rice Outlet, kaduha sulod sa usa ka bulan. (BANAT NEWS)