Palma nasubo sa divorce bill
Nabalaka ang Arsobispo nga ang deborsiyo himuon na unya kining rason sa pipila nga dili na lang mangita og pamaagi aron maresolbar ang problema sa ilang kaminyoon. File
CEBU, Philippines — Si Cebu Archbishop Jose Palma mipadayag sa iyang kasubo human giaprobahan sa house committee ang divorce bill. Atol sa 4th Shepherds Cup nga gipahigayon sa Archdiocese of Cebu ug DYRF kagahapon, si Palma mibutyag sa Banat News sa mao niyang kasubo diin matud niya nga ang mga kongresista representante sa katawhan.
Mikwestiyon si Palma kong ang maong mga kongresista nangutana ba usab sa sentimento sa kinabag-an nga katagilungsod.
Matud ni Palma nga wala niya gisalikway nga adunay problema sa mga magtiayon apan dili kini rason aron mosangpot sa pagdeborsiyo tungod kay nalatid sa balaod nga bililhon ang kinabuhi.
Nabalaka ang Arsobispo nga ang deborsiyo himuon na unya kining rason sa pipila nga dili na lang mangita og pamaagi aron maresolbar ang problema sa ilang kaminyoon.
Ang mga ginikanan o magtiayon angayang magsinabtanay tungod kay ang epekto sa deborsiyo ang maapektohan niini ang kabataan ug kultura sa mga Pinoy nga hangtud sa kamatayon ang kaminyoon.
Dugang ni Palma nga malaumon siya nga dili mapasar ang deborsiyo apan wala siya masayod sa mga huna-huna sa mga kongresista nga ubos sa administrasyon karon. (BANAT NEWS)
- Latest
