Gun-for-hire patay
CEBU, Philippines — Patay ang usa ka gipasanginlang gun-for-hire nga suspek usab sa pagpatay sa usa ka polis dihang kini giingong misukol pag-serve sa warrant of arrest sa Barangay Basak, Dakbayan sa Lapu-Lapu kagahapon sa hapon.
Ang team sa Regional Intelligence Division nga gipangulohan ni Senior Inspector Wendell Abellana ug mga sakop sa Lapu-Lapu City Police Office (LLCPO) mosikop unta kang Dante Betaganzo sa kasong robbery.
Matud pa nga imbes motahan miibot kini og armas ug misuway pagpusil sa mga polis apan giingong wala makabuto hinungdan nga naunhan na hinuon.
Si Abellana miingon nga si Betaganzo maoy usa sa mga kauban sa gipangita nilang grupo sa mga gun-for-hire nga gipangulohan ni Emedio Aparece Jr., nga gikataho nga suspetsado sa pagpatay kang Senior Police Officer 1 Alejandro Estorgio didto sa Buenavista, Bohol niadtong Pebrero 12 ning tuiga.
Si Estorgio nagbantay sa disco tungod sa pista sa lungsod dihang gipusil ni Aparece. Ang kapolisan nakadawat og taho nga nasigpatan si Betaganzo sa maong dapit hinungdan nga ila kining giadto aron unta dakpon. (BANAT NEWS)
- Latest