Pagpalit unta og overpriced clamps nasakpan
CEBU, Philippines — Gibutyag ni Mayor Tomas Osmeña nga ang administrasyon ni kanhi mayor Michael Rama namalit unta og mahal kaayo nga tire clamp alang sa CITOM nga ang kantidad mohapit tag P45 mil matag usa.
Matud ni Osmeña nga sa wala pa ang eleksyon kaniadtong 2016, ang administrasyon ni Rama mihimo og purchase request alang sa 100 ka wheel clamps sa kantidad nga P4,495,000.
Si Osmeña miingon nga diha nga napilde si Rama ug siya na ang mibanos paglingkod isip mayor sa dakbayan, gipakanselar niya ang maong pagpalit unta og clamps nga gituohan niyang gipaburot ang presyo.
Ang kontraktor nga palitan unta og mga clamps sa dakbayan atol sa administrasyon ni Rama, taga Surigao del Norte nga matud ni Osmeña ang contact numbers, pre-paid cellphone ra.
Matud sa mayor nga atol sa iyang administrasyon, nagpapalit siya og susama nga tire clamps sa mao gihapon nga gidaghanon, ug ang kantidad miabot lang og P845,700 apil ang dagko nga clamps nga para sa truck.
Gipakanselar ni Osmeña ang kontrata pagpalit ni Rama og mahal kaayong clamps, ilabi na nga ang supplier wala makasumiter og performance bond.
“In one purchase alone, I saved the taxpayers of Cebu over P3.6 million,” matud ni Osmeña sa iyang post sa Facebook.
Sa iyang bahin, si Rama miingon nga ang pagpalit unta sa maong mga clamp miagi gyud og proseso. Matud ni Rama nga si Osmeña nagsige lang gyud og pangita’g sayop kaniya.
Matud ni Rama nga si Osmeña wala na gyud makatrabaho pag-ayo isip mayor kay nagsige na lang og pangita’g kurapsiyon atol sa iyang administrasyon.
“I pity him, because it has never been personally my cup of tea the matter about corruption. I do not know about it. The mayor cannot be checking from A to Z, because there is procurement process,” sigon pa ni Rama. (BANAT NEWS)
- Latest
