CEBU, Philippines — Kontrobersiyal nga inmate sa Talisay City Jail nga gibalhin sa Mandaue City Jail nakuhaan og mga kontrabando, lakip ang peke nga PNP identification card nga nagranggo og Senior Police Officer 4 atol sa gipahigayon nga greyhound operation kagahapon sa kaadlawon.
Si Supt Jessie Calumpang, Mandaue City Jail Warden nga nahinabi sa Banat News miingon nga kauban nila sa operasyon ang mga sakop sa Philippine Drug Enforcement Agency.
Nakakuha sila og usa ka tablet, tulo ka cellphones, drug paraphernalia ug fake PNP I.D. kang Steve Go.
Maghimo usab sila og imbestigasyon kung nganong aduna pa gihapoy nakalusot nga mga kontrabando ug kon kinsa ang mga nagpaluyo niini.
Ilang pasakaan og laing kaso si Go nga illegal possession of contrabands ug ang pagkanselar sa prebilihiyo niini nga siya maduawan.
Dako ang pagtuo ni Calumpang, nga adunay posibilidad nga posibleng gamiton ni Go ang iyang fake PNP ID.
Gawas sa mga kontrabandong nakuha kang Go, wala nay laing nakuhang ilegal sa ubang selda gawas lang sa mga ginamit nga drug paraphernalia.— Romeo T. Limpangog (BANAT NEWS)