OIC sa CCPO molingkod karong adlawa
CEBU, Philippines — Hulipan na ang officer-in-charge sa Cebu City Police Office nga si Senior Supt. Angeles Geñorga human niluwat og kamanduan ang Kampo Crame nga himuon siyang acting director sa Bohol Provincial Police Office karong adlawa.
“May ilalagay na OIC ulit dito. Di mava-vacuum ng leadership ang Cebu City,” matud ni Geñorga.
Ang maong opisyal gibutang niadtong Enero 12 isip OIC samtang kasamtangan pa nga nag-schooling sa Japan ang city director sa CCPO nga si Senior Supt. Joel Doria.
Kini aron aduna gihapoy senior officer nga mangulo sa CCPO alang sa Sinulog 2018 bisan pa man nga si Police Regional Office-7 Director, Chief Supt. Jose Mario Espino, ang mangulo sa seguridad sa tinuig nga kasaulogan gumikan sa gipatuman nga major event security framework.
Apan kagahapon gibutyag sa acting chief sa Personnel and Records Management sa PRO-7, Supt. Jonathan Abella, nga giputol na kini kutob kagahapong adlawa nunot sa kamanduan sa Kampo Crame.
Si Geñorga kasamtangang mohulip kang Senior Supt. Felipe Natividad isip director sa BPPO nunot sa iyang promotion sa kaulohan.
Matud ni Abella nga si Supt. Julian Entoma, OIC sa Regional Operations and Plans Division sa PRO-7, ang kasamtangang ibutang isip OIC sa CCPO hangtud nga mobalik si Doria karong Pebrero 3, 2018.
Asoy pa ni Geñorga nga sa tulo ka adlaw niyang pagserbisyo ubos sa CCPO, iyang nasaksihan ang tumang kooperasyon sa mga Sugboanon alang sa Piyesta Senyor.
“Ang mga Cebuano napaka, hindi lang mabait, cooperative pa and willing silang gawin para sa Cebu at para kay Sto. Niño. Less ang resistance pag may binago kang sistema. Pati mga kapolisan willing silang mag-render ng service beyond office hours,” matud ni Geñorga. (BANAT NEWS)
- Latest
