CEBU, Philippines — Ipailawom sa seminar sa Commission on Human Rights ang mga operatiba sa Drug Enforcement Unit sa Cebu City Police Office sa dili pa sila magsugod sa ilang operasyon batok sa ilegal nga drugas sunod semana.
Kini aron mapahinumduman ang kapolisan sa lagda sa katungod sa katawhan nga dili malapas, matud ni CCPO Deputy Director for Administration, Supt. Artemio Ricabo.
Gidayeg ni CHR-7 Director, Atty. Arvin Odron, ang lakang sa CCPO sa pagpaapil sa mga sakop sa DEU sa human rights seminar.
Matud ni Odron nga sa tibuok Central Visayas, ang CCPO lang ang nakig-alayon kanila kabahin sa kampanya batok sa drugas sugod pa niadtong bag-ohay pa lang gisugdan ni Presidente Rodrigo Duterte ang maong kampanya.
Gibana-banang 30 ngadto sa 50 ka operatiba sa CCPO samtang 15 gikan sa tagsa-tagsa ka police station sa Dakbayan sa Sugbo ang magsugod og pangronda sa mga notadong tigpahuyot og shabu sunod semana.
Dugang ni Ricabo nga magamit na ang unom ka body cameras sa mga operasyon apan matud pa nga kuwangon ra kini sanglit wala kini mabalanse sa ihap sa ilang mga operatiba. (BANAT NEWS)