Motorista walay lisensiya naimbargohan og shabu

CEBU, Philippines — Usa ka motorista kinsa giingong naimbargohan og shabu nasikop sa gipahigayong checkpoint sa kapolisan diha sa Rabaya St. habig sa Sitio Kimba, Barangay Cansojong, dakbayan sa Talisay kagahapon sa kadlawon.

Ang nasikop mao si Mark Bacalso, 37-anyos nga taga Sitio Tunga, Barangay Tanke sa nahisgutang siyudad.

Si SPO4 Frederick Larrobis sa Talisay City Police Station mibutyag nga ilahang nakita si Bacalso nga nagmaneho sa Mio nga motorsiklo nga adunay kolor nga pink ug itom nga nagtangag sa plakang 89925. Gipangitaan nila kini og lisensiya apan pakyas ang naulahi sa pagpakita niini.

Giingong nakit-an   sa grupo ni Larrobis nga nag-checkpoint nga dunay gibitbit si Bacalso nga gamay’ng sudlanan ug duha ka gagmay’ng paketeng shabu diay ang sulod niini.

Gidala sa Talisay City Police Station ang dinakpan ug gipasakaan og kaso kagahapon diha sa piskaliya sa siyudad. (BANAT NEWS)

Show comments