Namuyo sa merkado sa Lagtang mamahawa na

CEBU, Philippines — Nisaad ang mga namuyo sa merkado sa Lagtang, Dakbayan sa Talisay nga mobiya sila karong Nobiyembre 29 ug mangita na sila og ilang kapuy-an.

Kini gumikan kay gamiton na sa siyudad ang lugar nga ilang gi-okupahan aron himuong technical-vocational school.

Ang mga namuyo sa lugar nipirma sa kontrata aron sila mobiya na ug nisugot nga patas-an ang ilang madawat gikan sa P8 mil ngadto sa P10 mil matag pamilya.

Si Atty. Rudelyn Navarro, city administrator, nagkanayon nga gipatas-an nila ang cash assistance tungod kay dili makahatag ang siyudad og relocation site sa mga maapektuhang pamilya nga moabot sa 38 kabuok.

Si Mary Jean Cabusas, usa sa mga residente sa lugar, niingon nga ila na lang dawaton ang gitanyag sa kagamhanan.

Siya nagkanayon nga uban kanila manguli sa ilang probinsya samtang ang uban wala pa makadesider kung asa sila moadto kun moabot na ang adlaw nga ilang gisaad.

Nihatag og hangtud Disyembre ang kagamhanan aron masugdan na ang proyekto alang sa kabataan.

Human sa gihimong pinirmahay, gikanselar na dayon ang paghatag nila og lugway sa mga namuyo sa lugar.

Ang siyudad nisaad sab nga mohatag og higayon sa ilang mga anak nga gustong motungha sa maong eskwelahan apan nikanselar sab sa ilang saad nga mohatag og kagamitan gikan sa City Engineering’s Office aron sa pagtukod og panimaye ingon man sa pagpatrabaho sa ilang mga sakop sa pamilya sa City Hall isip mga job order nga kawani.

Nalipay si Navarro sa ilang nakab-ot nga kasabutan ug nanghinaut nga matuman kini nga malinawon. (BANAT NEWS)