‘Wanted’ sa tulis gipatay sa kauban
CEBU, Philippines — Gipasanginlang ‘most wanted’ sa tulis ug kawat sa hurisdiksyon sa Waterfront Police Station ang nakalas human giingong giunay pagpusil sa iya ra usab sakay sa motor niadtong Huwebes sa gabii sa eskina Sikatuna ug Echavez Street, Barangay Zapatera ning Dakbayan sa Sugbo.
Ang nakalas naila nga si Christian Yurag, 24, taga Silangan 2, Barangay Tejero , samtang ang mamumuno wala mailhi apan giingong sakay kini sa motor sa biktima.
Matud pa ni Senior Police Officer 1 Joje Magdadaro, imbestigador sa Cebu City Homicide Section posibleng kaila ra ang biktima ug ang gikatahapan.
Sumala pa ni Magdadaro adunay nagsunod sa duha nga nakamatikod nga naglalis ang duha. Si Yurag nakaangkon samad pinusilan sa iyang abaga, ulo ug likod nga bahin sa lawas ug patay na pag-abot sa tambalanan.
Si Police Officer 3 Lester Reyes, Desk Officer sa Waterfront Police Station nitug-an nga suspek sa mga pagpanulis ug kawat diha sa ilang area of responsibility si Yurag. (BANAT NEWS)
- Latest