CEBU, Philippines — Nagdugang og watchmen ang Kapitolyo alang sa Cebu Provincial Detention and Rehabilitation Center.
Sumala ni Bonifer “Bhobby” Nacorda, ang Human Resource Department Officer sa Kapitolyo, nga sa pagkakaron 10 na ka watchmen ang ilang na-hire ug gikatakdang ipaubos sa orientation.
Aduna pay duha nga matud pa niya gikompleto na lang ang mga rekisitos nga gikinahanglan.
Matud ni Nacorda nga base sa gipangayo sa assistant jail warden nga si Audesti Miguel, 20 ka watchmen ang gikinahanglan sa prisohan ilabi na nga 10 ka jail guards ang napaubos sa usa ka buwan nga preventive suspension.
Si Gobernador Hilario Davide III nimando nga ipaubos sa preventive suspension ang 12 ka personnel sa CPDRC kinsa 10 ka guwardiya ug duha ka casual nga empleyado samtang sila gipaubos sa imbestigasyon sa Committee on Discipline and Investigation (CODI) sa Kapitolyo. Si Nacorda nagkanayon nga ila karon gihan-ay ang trabaho sa mga nahabilin nga personnel sa CPDRC aron ma-cover niini ang nabiyaan nga trabaho sa mga gipangsuspenso nga mga guwardiya sanglit dili man mahimo sa mga watchmen ang nabiyaan nga trabaho sa mga jail guards.
“Ang job order personnel nga watchmen ang ilang mahimo ra gyud kay pagbantay sa perimeters, sa katong mga prison guards nga naa gyud mas bug-at nga responsibilidad dili na siya pwede buhaton sa watchmen so mao na nag-arrange sa mga functions sa mga nahabilin nga permanent para more or less maoy mo-cover sa function sa mga gi-preventive suspension nga mga empleyado,” matud ni Nacorda. (BANAT NEWS)