CEBU, Philippines — Usa ka security agency supervisor ang gipangita karon human gipasanginlang nidagan dala ang dul-an P500 mil nga payroll money sa gitrabahoan niini.
Si Senior Police Officer 3 Renato Canja sa Presinto 1 sa Mandaue City Police Office (MCPO) nagdumili una pag-ila sa suspetsado nga nagtrabaho sa Philippine Marshal Agent Security Services.
Gisugo ang suspek paghulog sa money transfer sa P450 mil nga pangsuweldo sa 120 ka mga guwardiya apan wa na pakita ug giabandonar ang service motorcycle sa Barangay Mantuyong.
Ang tagdumala sa maong security agency nga si Edwin Jakosalem igo na lang pagsumbong sa kapolisan.
Gawas niana, adunay napulo ka aplikanteng gwardiya ang mireklamo batok sa suspek kay matud pa gipangayoan sila niini og tag P4 mil para sa ilang training ug lisensya apan wala gyud kini mahitabo.
Laing reklamo batok sa suspetsado mao ang P10,000 nga loan sa ilang security agency ug gidala pa ang usa sa ilang mga armas. (BANAT NEWS)