CEBU, Philippines — Nasamdan ang polis dihang nisukol ang minor de edad nga ilang gisita nga nagbitbit og kutsilyo sa Sitio Mananga 2, Tabunok, Dakbayan sa Talisay niadtong Miyerkules sa hapon.
Ang dinakpan nagpangedaron pa lang og 17-anyos nga nagpuyo sa maong dapit.
Sila si PO1 Ramonito Dinapo ug PO1 Erwin Denila nagpatrolya dihang nakasugat og tawo nga nisumbong kanila nga aduna’y armadong lalaki sa lugar.
Ang lugar nga gitug-an mao ang dapit diin daghan ang mga mangunguot, tulisan ug bisan unsang kriminal nga makahimo og krimen.
Sila si Dinapo ug Denila dali nga nitubag sa maong sumbong ug didto ilang nakita ang lalaking nagbitbit og kutsilyo.
Dihang ilang gisita nisukol kini hangtud nga nasamdan gyud si Dinapo sa wala’ng kamot human naigo sa pito ka pulgadang kutsilyo.
Maayo na lang kay napusasan dayon ang menor de edad kinsa gidudahan nga usa sa mga tulisan sa lugar.
Gi-hold lang una ang dinakpan sa ilang buhatan. (BANAT NEWS)