CEBU, Philippines — Nagplano si Gobernador Hilario Davide III nga makighinabi sa mga sakop sa Provincial Board aron nga mopasar kini og ordinansa sa pag-institutionalize sa purok system sa Probinsya sa Sugbo.
Si Davide atol sa usa ka conference nga Purok Talks: Engagin’ Conversations, Engagin’ Partnerships, nga gusto niya mosundog sa Lalawigan sa Bohol sa purok system niini.
Matud ni Davide nga ang purok system usa ka epektibong pamaagi alang sa mga opisyal sa gobiyerno aron mahibalo sa panginahanglan sa mga konstituwente niini ilabi na sa grassroots level.
“The purok system can provide us with an effective feedback mechanism on the kind of projects and interventions the people want us to implement in their areas,” matud ni Davide.
Sa report sa Cebu Provincial Government website, si Davide nagtuo nga sa maong sistema ma-empower niini ang mga tawo ilabi na nga mahatagan sila og kahigayunan nga maka-identify og mga proyekto ug programa nga alang ra sab kanila.
Sa pagkakaron ang Probinsya sa Sugbo nakig-alayon sa Mega Cebu alang sa pag-organize sa mga barangay aron nga makaumol sila sa ilang kaugalingong purok system. - /GMR) (BANAT NEWS)