CEBU, Philippines — Mobisita sa nagkalainlaing simbahan sa Sugbo ang imahen sa Birhen sa Regla sa Dakbayan sa Lapu-Lapu isip kabahin sa pagpangandam alang sa kapistahan karong Nobiyembre 20.
Si Nora Mangubat, pangulo sa Parish Pastoral Council, nipahibawo nga sa Septiyembre 29 magsugod sa pagbisita ang imahen.
Kini kuyogan sa kaparian ug mga deboto sa paglawig sa Mactan Channel gikan sa simbahan sa Birhen sa Regla sa Dakbayan sa Lapu-Lapu paingon sa Basilica Minore del Santo Niño sa Dakbayan sa Sugbo diin magpabilin kini sulod sa tulo ka adlaw.
Sunod nga bisitahon ang Lungsod sa Cordova dayon ang mga barangay sa Dakbayan sa Lapu-Lapu sama sa Babag, Kalawisan, Looc, Marigondon, Pajo, Poblacion ug uban pa.
Ang pagsuroy matapos atol sa fluvial procession sa adlaw sa iyang kapistahan sa Nobiyembre 20. (BANAT NEWS)