CEBU, Philippines - Sugdan karong adlawa sa House of Representatives committee on ecology ang congressional inquiry bahin sa kontrobersyal nga pag-import dinhi sa Sugbo og 5-milyones ka kilong basura gikan sa South Korea.
Base sa listahan nga nakuha sa The Freeman, igsuong pamantalaan sa Banat News, imbitado sa komitiba sila si Cebu City Mayor Tomas Osmeña, Mandaue City Mayor Luigi Quisumbing, kanhi Cebu City Councilor Augustus “Jun” Pe, incumbent councilor Joel Garganera ug Tingub barangay captain, Atty. Randy Pareja.
Ipatawag usab ang mga sakop sa Bureau of Customs-Cebu nga naglakip sa kanhi officer-in-charge sa BOC Cebu nga si Atty. Rico Rey Francis “Koko” Holganza nga mao na karon ang deputy collector for operations, Jessica Delgado sa Entry Processing Unit, Dennis Adisas ug Cirila Lumacad sa Assessment Division ug Conrado Abarintos sa Cash Collection Division.
Apil usab sa imbitado sila si Romer P. Gastador sa Alin Customs Brokerage, Denes Negro Camay, presidente sa Moving Forward Global Trading Inc., Sugar Camay sa Robinland Forward Global Trading Inc. ug Israel Alin sa Alin Customs Brokerage.
Samtang aduna say mga opisyales sa Environmental Management Bureau-7 ang imbitahon sa maong inquiry. Kahinumdoman nga si Cebu Third District Representative Gwendolyn Garcia misang-at niadtong Agosto 2 sa House Resolution No. 1155 nga nanawagan pagpahigayon og imbestigasyon bahin sa maong kontrobersiya.
“There is a need to conduct an investigation, in aid of legislation, to ferret out the truth about the South Korean garbage, to determine the persons responsible for this illegal exportation, and to inquire into whether our present environmental and customs laws are adequate to safeguard the Philippines from, and our enforcement bodies sufficiently armed in the face of the onslaught of foreign garbage,” sumala pa sa resolusyon ni Garcia. Dako ang pagtuo ni Garcia nga dili makasulod sa Sugbo ang maong mga basura kon walay panagkunsabo sa mga opisyales kay walay nasud nga mo-export og basura kon walay kasigurohan nga adunay dumpsite o landfill nga labayan niini dinhi sa Sugbo ug mapugngan unta ang pagdiskarga niini kon wala pay nagkunsabo.
Ang maong mga basura gikarga sa MV Christina nga niabot sa Pier 3 sa Cebu City niadtong Enero 20, 2017 gikan sa Jeju Port sa South Korea. Ang mga basura gidiskarga ug gidala sa consignee nga Moving Forward Global Trading Inc. sa Barangay Guizo ug sa open dumpsite sa Barangay Tingub sa Mandaue City.
Tungod sa kabaho niini, nireklamo ang mga residente sa Tingub ug nisumbong hangtud nga nigawas kini sa media nga nangutana dayon sa BOC kabahin niini. Niadtong Pebrero 8, 2017, si BOC-Cebu district collector Elvira Cruz mipagawas og warrant of seizure and detention tungod sa matud pa intentional misdeclaration sa maong shipment nga gibutang nga “recycled plastic resin and wood chips” apan diay to sagolsagol nga basura sumala pa sa pagsusi sa Department of Environment and Natural Resources-Environmental Management Bureau-7.
Usa ka concerned citizen ang misuwat kang Presidente Rodrigo Duterte sa miaging buwan nga mipasangil kang Osmeña, Pe, Holganza ug uban pa nga maoy nalambigit sa pagpasud sa maong basura dinhi, apan silang tanan mihimakak niini.
Si Osmeña dili makatambong kay aduna kini court hearing sa Bacolod City apan morepresentar kaniya si special assistant, Bimbo Fernandez. Ug report ni Odessa Leyson sa The Freeman (BANAT NEWS)