CEBU, Philippines - Gikonsiderar ni Cebu City Mayor Tomas Osmeña nga mangutang og P40 milyones sa bangko aron ibayad sa paghakot sa daang basura nga napundo sa transfer station sa Barangay Inayawan.
Moabot sa 11,000 tonelada ang basura nga kinahanglan hakuton sa transfer station apan ang problema kay wala’y budget ang siyudad alang niini.
Sigun ni Osmeña nga ang maong mga basura resulta kini sa haw-ang sa kanhi service provider nga mao ang Jomara Konstruct Corporation ug sa kasamtangang service provider nga Pasajero Motors Corp. (PAMOCOR).
Matud ni Osmeña nga dili siya gusto og emergency purchase dungan ang pagbutyag nga angayan nga limpyohan ang City Hall sa mga bati nga binuhatan.
Ang pagpangutang sa bangko tungod kini kay ang “schedule program of fund” na-maximize hangtud sa katapusang bahin niining tuiga ug dili sab gusto ang mayor nga maapektuhan ang asphalting program ug ang senior citizens.
Hinoon moagi pa kini sa konseho sa siyudad ug magkinahanglan kini sa ilang pagtugot. (BANAT NEWS)