CEBU, Philippines - Mga militanteng pundok gipaabot nga molusad og lihok protesta atol sa State of the Nation Address ni Pres. Duterte karong adlaw nga Lunes.
Ang Bagong Alyansang Makabayan miingon nga manukad sa Cebu Provincial Capitol padulong na sa dalan Colon diin adto nila iyagyag ang mga demanda nila sa presidente.
Gusto nilang ipadayon ang sabot-kalinaw tali sa National Democratic Front, social economic reforms, ihunong ang martial law sa Mindanao ug dili ipadayon ang planong pagpatuman niini tibuok nasud, buhian ang mga political prisoner ug ipatuman ang comprehensive agreement ug bawion ang DOLE Order No.174.
Matud pa ni Jaime Paglinawan, pangulo sa Bayan Central Visayas adunay mga nahimo ang presidente sa iyang mga panaad, apan pipila lang kini tungod kay daghan pa ang wala niya natuman ug puros lang usab-usab ang iyang mga baruganan tungod sa sulsol sa iyang mga alipores.
Si Paglinawan miingon nga nadismaya sila nga giatras ni Duterte ang sabot-kalinaw tali sa gobiyerno ug Communist Party of the Philippines-New Peoples Army-NDF.
Matud niya mao kini ang tubag sa tanang mga kagubot sa nasud ug malaumon siyang maminaw si Duterte sa katawhan ug dili sa mga retiradong heneral nga tigtambag niini. (BANAT NEWS)