CEBU, Philippines - Ang mga konsehal nga alyado sa Team Rama wala g’yud makagusto sa plano ni Mayor Tomas Osmeña nga mangabang na lang ang Dakbayan sa Sugbo og garbage truck aron mohakot sa mga basura dinhi sa siyudad.
Sila si Konsehal Raymond Alvin Garcia ug Konsehal Joel Garganera nagtuo nga modako g’yud ang gasto sa dakbayan kon mangabang og garbage trucks imbes nga mamalit kini og bag-o nga trak para sa mga basura.
Matud ni Osmeña nga naproblema gyud siya karon tungod kay kadaghanan sa mga garbage truck nga binuhat sa China nga gipamalit sa administrasyon ni kanhi mayor Michael Rama, mga gubaon na.
Nasayran nga ang Pasahero Motors Corporation nga gipanag-iya ni Kasambagan Barangay Captain Franklyn Ong, nga higala sa mayor, maoy nakadaog nga hauler paghakot sa mga basura gikan sa transfer station paingon sa landfill sa Consolacion.
Ang siyudad mobayad og P1,333 sa matag usa ka tonelada (1,000 kilos) nga basura nga mahakot sa Pamocor.
Matud ni Garganera ug Garcia nga bisan gani ang pagkuha og private hauler nga mohakot sa basura paingon sa landfill, dili g’yud tukma mao nga dako na kaayo karon ang magasto sa siyudad. - /EIM) (BANAT NEWS)