CEBU, Philippines – Gibalhog sa sulod sa detention cell sa Danao City Police Station ang usa ka babaye nga nadakpan sa mga sakop sa Bureau of Jail Management and Penology (BJMP) sa Dakbayan sa Danao nga nisuway og palusot og duha ka gagmay nga paketeng shabu alas 10 pasado ang takna kagahapon sa buntag.
Si Senior Police Officer 1 Arnold Labine miila sa nadakpan nga mao si Jessa Calvo, 22, walay trabaho nga taga Tabok Camalig-Bato sa maong dakbayan.
Matud pa ni Labine nga nahidangat adunay giduaw nga higalang napriso si Calvo.
Ang jail guard on duty nga si Jail Officer 1 Rommel Mianco ug JO1 Rahaied Cimeni mirekisa kaniya isip kabahin sa seguridad ug didto nasakpan nga may giluklok kining duha ka paketeng shabu.
Ang dinakpan nga nagtingkagol na karon sa sulod sa detention sa Danao City Jail ug gikatakdang kasohan ugmang adlawa.
Samtang nadakpan sa checkpoint sa Presinto 1 sa Mandaue City Police Office (MCPO) sila Jayson Tangarro, 43, taga Isla de Palma, Barangay Looc, Dakbayan sa Mandaue ug Alvin Jimenez Villegas, 22, taga Sitio San Jose, Barangay Labogon human nakuhaan og ilegal nga drugas.
Matud pa ni PO3 David Omambac, nadakpan ang duha sa dalan FF Cruz sa North Reclamation Area sa Barangay Centro.
Gipahunong ang duha sa checkpoint ug didto nasakpan nga aduna sila’y duha ka gagmay nga paketeng gituohang shabu sa bulsa sa jacket nga itom nga gisul-ob niini.
Samtang nadakpan usab ang giisip nga High Value Target nga pusher og shabu sa Barangay Danlag, Lungsod sa Consolacion nga si Bryle James Viking Pasilang alyas BJ, 22.
Nasikop kini human motunol og gamay nga paketeng shabu ngadto sa ilang poseur buyer bugti sa P200 nga marked money nga gibayad niini. Nakuhaan siya og unom ka paketeng gituohang shabu. -/EIM (BANAT NEWS)