CEBU, Philippines - Duha ka lalaki namatay dihang gibukbok ang ilang mga ulo sa managlahing higayon didto sa Toledo, Boljoon ug Aloguinsan probinsya sa Sugbo niadtong Domingo sa gabii.
Sa Boljoon, gihapsan og bato ang ulo sa biktima nga si Juanito Transmil Cairo, 50, taga Sitio Ylaya, Barangay Upper Becerril, Boljoon. Ang suspek mao ang iyang pag-umangkon nga si Jeffrey Transmil Cairo, 28, taga Sitio Lingatong sa mao gihapong barangay.
Asoy sa imbestigador sa maong kaso nga si Police Officer 3 Nelson Saquibal sa Banat News nga nagsakay og motor si Juanito pauli sa dihang gipahunong siya sa iyang pag-umangkon nga nag-atang sa dalan ug way daghang pangutana gihapsan kini og bato sa ulo.
Ang bato pareha og gidak-on sa kinumo sa maong suspek matud pa ni Saquibal. Sumala pa ni Saquibal, nagdumot ang suspek sa uyoan kay matud pa manapat kini kaniya kun mahubog. Gibutyag ni Saquibal nga pipila ka adlaw sa wala pa nahitabo ang maong pagpatay, nagkalalis ang duha tungod kay nahubog si Juanito ug matud pa nga nadapatan niya si Jeffrey ug niresulta kini sa sinumbagay sa duha.
Nakaangkon og dakong samad sa ulo ang biktima ug dali nga gidala sa Vicente Sotto Memorial Hospital apan matud pa patay na kini pag-abot sa maong tambalanan. Sa Aloguinsan, gipusdakan usab og hollowblock ang ulo sa 48-anyos nga si Crisanto Unabla sa suspetsado nga si Richard Cimafranca, 37.
Matud pa ni SPO1 Solomon Cardoza sa Aloguinsan Police Station nga nagmaneho og motor ang biktima pauli sa ilaha. Sumala pa nga naagian sa biktima ang suspek kinsa nagbitbit og hollowblock ug diretsong mipusdak sa ulo niini. Dihang natumba na kini, gikatahong gidugsak-dugsak sa suspek ang nawong ug ulo ni Unabla gamit ang bara de kabra hinungdan sa naangkon niining dakong kadaot sa ulo ug nawong. (BANAT NEWS)