“Foreign fighters” napatay

CEBU, Philippines - Sama og gipamugos ang ideya nga “gisulong og taga laing nasud” ang Pilipinas maong makatarunganon ang pagdeklarar og martial law sa Mindanao tungod sa matud pa napatay nga mga langyaw nga terorista sa nagpadayong operasyon batok sa Islamist terrorist didto sa Marawi City.

Ang maong engkwentro miresulta na sa kamatayon sa 44 na ka mga tawo nga naglakip sa mga sundalo, polis, 31 ka terorista ug sibilyan.

Ang tigpamaba sa Armed Forces of the Philippines Brig. Gen. Restituto Padilla sa press briefing sa Davao City miingon nga adunay mga teroristang gikan sa Singapore, Malaysia ug Indonesia nga naapil sa mga nakalas sa engkwentro.

"We are continuously verifying that there have been a number of them who have been killed," pasabot pa hinuon ni Padilla nga wala pa makahatag og kongkretong impormasyon bahin sa maong mga langyaw.

"There is a certain information that we received which confirmed the killing of 12 members of this group and half of that are foreign terrorist Malaysians, Indonesians, and one other," dugang pa niya.

Si Solicitor General Jose Calida sa mao gihapong press conferrence nagtuo nga ang pag-apil sa mga langyaw nga terorista sa pag-atake mokompleto sa rekisitos sa Konstitusyon aron makatarunganon lang nga magdeklarar og martial law.

Kahinumdoman nga daghang mga eksperto sa balaod ang mikuwestyon sa deklarasyon ni Duterte kay wala ang mga elemento nga maoy basehanan kay ang nahitabo sa terorismo ug kriminalidad nga binuhatan sa Maute group ug Abu Sayyaf.

"What is happening in Mindanao is no longer a rebellion of Filipino citizens. It has transmogrified into an invasion by foreign terrorists who heeded the clarion call of [the Islamic State]," matud pa niya sa report sa Philstar.com.

Ang mga elemento pagdeklarar og martial law mao ang rebelyon ug kun gisulong ang nasud og taga laing nasud.

"Terrorism has no political purpose of taking out a part of the Philippines or a part of the armed forces from the jurisdiction of the Philippines," pasabot pa usab ni Atty. Christian Monsod, usa sa mga nitabang pagpanday sa 1987      Constitution sa pakighinabi kaniya sa Philstar.com.

Samtang giawhag ni Col. Medel Aguilar, sa Central Command ang mga netizens nga mahimong responsable sa ilang gipang-post sa social media ug sa mga text message bahin sa sitwasyon.

 “By circulating the report of unverified information, that is the most irresponsible action. So do not be irresponsible,” awhag pa niya.

Mao usab kini ang panawagan ni CCPO public information officer Sr. Insp. Ramoncelio  Sawan.

Nihangyo usab siya sa mga motoristang magsakyanan nga mokooperar sa police checkpoints ug kadtong adunay armas kinahanglang ilang dad-on ang kompletong papeles niini.

Sa laing bahin, gibutyag ni Bohol Provincial Director Senior Supt. Felipe Natividad nga adunay 18 ka mga Muslim nga gikan sa Mindano nga nangabot sa Bohol sakay sa roro nga barko gikan sa Mindanao nga ilang gisusi ang pagkatawo.

Apan ilaha usab silang gibuhian  human ilang nasuta nga grupo kadto sa mga misyonerong Muslim nga taga Davao nga nanakay og roro gikan pa sa Cagayan De Oro.

“Lahat ng dumarating, tsini-check natin. Lahat ng mga roro. After they disembarked from the sea craft,” matud pa niya.

Si Cebu City Mayor Tomas Osmeña mipadayag usab nga bukas ang siyudad pagtabang bisan dili taga Marawi City nga nagkinahanglan og tabang. Camille Pateres , Decemay P. Padilla ug report gikan sa Philstar.Com (BANAT NEWS)