Nangawat sa motor nasikop sa drugas

CEBU, Philippines - Wala man tuod nasikop ang usa ka lalaki nga nangawat sa motorsiklo sa Lungsod sa Minglanilla apan nasikop siya sa Sitio Magay, Barangay Tangke, Dakbayan sa Talisay human siya nipalit og ginadiling drugas niadtong Miyerkules sa hapon.

Ang dinakpan mao si Joseph Secuya, 24-anyos, ulitawo nga nagpuyo sa Deca Homes, Barangay Tungkil, Lungsod sa Minglanilla.

 Si SPO1 Jeffrey Diola sa Talisay City Police Station niingon nga nagpahigayon lang sila og pagpatrolya sa maong lugar dihang ilang nasugatan si Secuya nga nagmaneho sa puwa nga XRM nga motorsiklo nga adunay plaka nga 4675 YZ.

Si Secuya ang kadudahan og lihok hinungdan nga ila kining gisita apan ang mga operatiba ang nakabantay nga adunay gihagbong ang suspek ug sa ilang pagsusi, ilegal nga drugas kini.

Sa iyang bahin si Secuya niingon nga wala niya gilabay ang ilegal nga drugas kun dili natagak kini sa iyang mga kamot.

Wala magdugay, usa ka Wilma Cui, 45-anyos nga taga Lungsod sa Minglanilla niingon nga iya ang motorsiklo nga gimaneho ni Secuya.

Gani siya nitug-an nga gikawat kini sa wala niya mailhing tawo samtang nakaparada sa merkado. Gibalhug sa bilanggoan ang suspek ug gikatakdang pasakaan og kaso. (BANAT NEWS)