CEBU, Philippines - Moabot na sa P1.8 milyones ang nakolekta sa Probinsiya sa Sugbo sa padayon nga pagpanakop sa illegal quarrying lakip na ang pagpanakop sa mga wala’y delivery receipt nga mga trucks nga nagkarga og bas ug graba.
Kini gikan sa 160 ka operasyon nga nahimo sa Provincial Environment and Natural Resources Office sa 28 ka lungsod ug dakbayan sa probinsiya sulod sa upat ka buwan karong tuiga.
Kasagaran nga nahimo sa mga operators mao ang kalapasan sa Provincial Ordinance No. 2011-23 o ang Load Limit Ordinance o overloading, wala’y provincial sticker, wala’y delivery receipt o tampered o gihilabtan ang delivery receipt.
Dili moubos sa P10 mil ang silot sa matag kalapasan nga nahimo.
Sa Dakbayan sa Toledo ang labing daghan nga trucks nga nadakpan nga muabot sa 33 gisundan sa Consolacion nga 21, sa Naga 19, sa Minglanila 14 ug Tuburan 11 ka trucks.
Si Baltazar Tribunalo, hepe sa PENRO, nagkanayon nga ang mga dagkong operators nikalma na karon itandi sa mga gagmay nga operators nga maoy kasagaran sa madakpan.
“Sako-sako naman lang or multi-cab na lang (ang gamit sa paghakot),” matud ni Tribunalo. (BANAT NEWS)