Nagduwa og moli-moli gipangsikop
CEBU, Philippines - Wala na makaipsot sa kapolisan ang upat ka lalaki nga naatlang nagduwa og moli-moli machine sa Deiparine Compound, Brgy San Isidro, Dakbayan sa Talisay niadtong Huwebes sa hapon.
Ang mga dinakpan mao sila si Alberto Lapitan, Kristian Roy De Guzman, Pilly John Salinas, ug Jude Molina.
Nakadawat og reklamo ang Talisay City Police kalabot sa presensya sa ilegal nga makina sa lugar hinungdan nga ilang gihimo ang operasyon.
Hilom nga misulong ang kapolisan sa lugar hinungdan nga wala makabantay ang mga dinakpan nga nagkalingaw sa pagduwa sa ilegal nga makina.
Gawas nga gisikop ang upat, gidala usab sa mga polis ang mga moli-moli machine nga nadugang sa nagtipun-og na nilang nasakmit.
Nagpaabot nga pasakaan og kaso ang mga dinakpan samtang gitanggong sa detention cell. (BANAT NEWS)
- Latest
