4 ASG gilubong na

CEBU, Philippines – Upat ka mga gituohang sakop sa Abu Sayyaf Group nga nakalas atol sa binakbakay tali sa mga kapolisan ug military sa Clarin, Bohol gihatagan gihapon og desenteng lubong sa maong lungsod kagahapon.

Samtang usa ka police official nga giingong taga Mindanao ang giimbitar sa militar human sila nakaagi sa checkpoint duol sa Barangay Bacani diin nahitabo ang engkwentro.

Unang narekober niadtong Sabado sa udto ang patay nga lawas ni Joselito Melloria, alyas Abu Alih nga gitumbok nga maoy local contact o nagdala gyud mismo sa grupo diha sa Bohol nga sakop na sa ASG.

Nianang pagka-alas 8 sa gabii subling miulbo ang engkwentro tali sa mga nahibiling kauban ni Melloria diha gihapon sa Sitio Lagsing, Barangay Bacani nga niresulta sa kamatayon sa tulo nga hangtud sa paglubong kagahapon wala pa gihapon mailhi sa kapolisan.

Ang mga patay nga lawas sa upat gilubong kagahapon sa sam-ang sa Barangay Cumang sa Clarin, Bohol. Miabot usab sila si PRO-7 Director Noli Taliño ug Gov. Edgar Chatto  ug ubang local nga opisyales sa lungsod ug kapolisan dihang padung na ilubong ang upat.  Si Melloria gisud og puti nga lungon gilubong kauban sa usa ka bangag  ang tulo pa niya ka mga wala mailhing kauban nga gisud og itom nga cadaver bags alas 3:45 sa hapon ug diha iyang inahan ug mga igsuon atol sa paglubong.

Usa ka joint press statement ang gipagawas sa Armed Forces of the Philippines ug Police Regional Office-7 kagahapon bahin sa nahitabo.

“Despite the reported hostile plan of these lawless men, they will still be afforded with a decent burial by the people they planned to harm before,” sumala pa sa pamahayag sa PRO-7 ug Central Command.

Sumala pa ni Senior Inspector Francisco Peroramas, hepe sa   Clarin Police Station alas 9 na sa gabii nakuha ang patay nga lawas sa tulo ug gidala kini dayon sa  punerarya.

Ang duha sa mga igsuon ni Melloria gusto untang dad-on sa ilang lugar sa Napo, Inabanga ang lawas niini apan gitambagan sila nga ipalubong na kini kay nagsugod na og kadugta, ang lubong gigastohan sa lungsod. “Wala pa nato na-identify kung kinsa sila (ang tulo), basta atoa na-confirm si Melloria ang usa. Positive man gi-identify sa taga Barangay Napo (Inabanga town) na siya gyud. Hasta mama ug igsuon niya, positively identified man,” matud niya. Tungod sa maong duha ka managlahing engkwentro sa Inabanga niadtong Semana Santa ug niadtong Sabado sa Clarin, mas gipahugtan karon sa PNP ug AFP ang ilang kooperasyon.

“It could be a matter of time before we can say that the threat is totally eliminated. The remaining lawless armed elements who are strangers in the area have nowhere to go. Nevertheless, our combined troops will remain cautious in their mission to neutralize what remains of the armed group from Sulu,” dugang pa sa pamahayag.

Kapin usa ka libo ka mga residente gikan sa Barangay Bacani, Nahawan, Kantuyok, Villaflor, Ilhan ug Uob ang gipabakwit ug anaa karon sa Cultural Center sa Clarin ug giatiman sa Department of Social Welfare and Development.

Sa laing bahin, gibutyag ni Senior Superintendent Felipe Natividad, director sa Bohol Provincial Police Office  nga ilaha pa karong gisusi kining report nga adunay police official nga giimbitar human kini naagi sa checkpoint.

Ang maong police official ug mga kaubang pasahero giingong pulos taga Mindanao.

“Actually, inaalam ko ‘yan. So I still have to check on that muna para masigurado po muna natin. Kasi hindi ko pa natitiyak, hindi pa tayo sure. We need to confirm po first sa ating investigation,” matud niya.Si Peroramas  sa iyang bahin wala usab mohatag og pamahayag bahin niini. Apan base sa nakuhang impormasyon gikan sa kasaligang tinubdan, ang maong opisyal giingong usa ka babaye ug giingong nadestino sa Police Regional Office 11.

“I still encourage people to remain vigilant. Hindi tayo titigil (sa laban against the rebel group). Hindi sa tinatakot ko sila, siyempre may nangyari didto. Hindi natin alam (ang susunod mangyayari). I would still advise them not to let their guard down,” dugang pamahayag ni Natividad.

Atol sa unang engkwentro didto sa Inabanga niadtong Abril 11, napatay  ang lima ka mga ASG apil niini ang ilang sub-leader nga si Muamar Askali alyas “Abu Rami”,  ug upat sa habig sa gobiyerno. -/EIM (BANAT NEWS)