CEBU, Philippines - Pormal nang gibuksan kagahapong adlawa ang 5 ka adlaw nga 2017 Association of Southeast Asian Nations Summit nga gipahigayon sa Shangri-La Hotel and Spa sa Dakbayan sa Lapu-Lapu.
Ang kalihukan sa ASEAN Summit gisugdan og debate nga gipasiugdahan sa Bangko Sentral ng Pilipinas – Official Monetary and Financial Institutions Forum, diin ang topic sa maong debate mao ang “Is Asia Bound To Follow The Advanced Economies New Mediocre” diin ang mga piniling speakers mipahayag sa ilang mga opinyon.
Ang maong summit gitambungan sa mga finance ministers ug Central Bank governors sa ASEAN.
Ang ASEAN nagselebrar karon sa iyang ika-50 ka tuig diin ang Pilipinas mao ang host ug aduna kini tema nga, “Partnering for Change, Engaging the World”. Kini matapos karong Biyernes, Abril 7.
Gipaabot sab nga mo-host og panihapon ang Kapitolyo uban ang kagamhanan sa Dakbayan sa Mandaue alang sa mga delegado ug ipahigayon kini karong Abril 6 sa Capitol Social Hall.
Matud ni Grace Paulino ang Cebu Capitol Protocol and Events Officer nga 200 ka mga delegado ang gipaabot nga mosalmot sa maong panihapon nga langkuban sa 8 ka nasud. Mitchelle L. Palaubsanon ug Le Phyllis F. Antojado (BANAT NEWS)