CEBU, Philippines - Patay ang usa ka drayber sa habal-habal nga gipusil sa duha ka wala hiilhing mga lalaking nagsakay og motorsiklo sa Sitio Cadulang, Brgy. Marigondon, Dakbayan sa Lapu-Lapu sa miaging gabii.
Si Police Officer 3 Marvin Saraum sa Homicide Section sa Lapu-Lapu City Police Office (LLCPO) miila sa biktima nga mao si Avelino Patigdas, 42, taga San Carlos Village sa maong barangay.
Matud pa ni Saraum nga naghatod og pasahero ang biktima sa Sitio Calubihan apan sa pagbalik niini adunay mga lalaking nagmotorsiklo nga nagsunod kaniya ang kalit nga nipusil kaniya sa makadaghang higayon.
Ang biktima nakabaton og pito ka mga samad pinusilan sa nagkadaiyang bahin sa iyang kalawasan ug nalamba ngadto sa karsada uban sa giluwanan niyang motorsiklo ug namatay.
Human sa maong pagpamusil ang duha ka wala hiilhing lalaki mipabulhot sa pagpadagan palayo sa wala na masayri nga direksyon.
Nakuha diha sa crime scene ang pito ka mga kabhang sa bala sa kalibre .45 nga pistola, cellphone sa biktima ug ingon ang motorsiklo nga giabangan sa biktima.
Padayon pa sila karon paghimo og dugang imbestigasyon sa maong pagpamusil tungod kay wala pa silay impormasyon sa kung unsay posibleng motibo sa maong pagpatay. - /EIM) (BANAT NEWS)