CEBU, Philippines - Karon adlawa hingpit na nga magsugod ang deployment sa Task Force Cebu dinhi sa Siyudad sa Sugbo ug makita na sa katawhan nga adunay mga sundalo nga ipakatap ug magdala og mga tag-as nga armas, apan gipanawagan sa mga opisyales sa siyudad nga dili kini angay ikahadlok ug ikabalaka sa publiko.
Kagahapon sa buntag, nakigtagbo ang mga sakop sa Task Force Cebu kang Cebu City Mayor Tomas Osmeña uban ni Konsehal Dave Tumulak, Deputy Mayor for Police Matters.
Matud ni Tumulak mihatag sa iyang final operational instruction si Osmeña sa mga sakop sa Armed Forces of the Philippines (AFP) ug Philippine National Police (PNP) Cebu City.
Dunay joint operation nga buhaton sama sa foot patrol, police-military visibility ug ang paghingusog sa community relation aron mapaduol ang law enforcement agencies sa katawhan.
Makita ang mga kasundaluhan, kapulisan lakip na sakop sa Philippine Drug Enforcement Agency (PDEA)-7 sa mga barangay nga gidudahang adunay presensiya sa illegal nga drugas.
Ang Task Force Cebu Commander nga si Col. Noel Baluyan miingon nga motabang sila pagsumpo sa krimen ug ilegal nga drugas.
Nagplano usab ang siyudad nga moumol og Special CAFGU Auxiliary Force, diin ang siyudad mang-recruit og mga sibilyan nga nag-edad og 18 ngadto na sa 40 anyos, molupyo sa Cebu City ug interesadong mahimong miyembro niini.
Ipaubos sila og 45 ka adlaw nga training ug ang siyudad maoy mogasto sa ilang uniporme ug bala samtang ang AFP maoy moisyu og armas. (BANAT NEWS)