CEBU, Philippines - Gisusi sa mga tinugyanan sa Provincial Epidemiological Surveillance Unit sa Provincial Health Office (PHO) kagahapon ang isla sa Barangay Carnaza, Lungsod sa Daanbantayan may labot sa insidente sa kalibanga.
Ang mga sakop sa PESU nagdala og mga tambal, chlorine granules ug hyposol alang sa Barangay Carnaza. Niadtong Pebrero 15, ang sanitation inspector sa Daanbantayan nikolekta og water sample gikan sa puso ug tabay nga tinubdan sa tubig sa lugar ug nasuta sa laboratoryo nga kontaminado kini sa kagaw.
Ang grupo mopahigayon usab og health education sa mga residente sa lugar diin ilang i-focus ang water sanitation. Niabot sa 101 ka residente sa Carnaza ang nagkalibanga kinsa siyam kanila ang na-admit sa Dublin Medical Clinic ug laing tulo ang na-admit sa Daanbantayan District Hospital.
Ang mga biktima nagpanuigon gikan sa usa ka tuig ngadto sa 66-anyos hinuon walay gikataho nga namatay. (BANAT NEWS)