CEBU, Philippines - Nigahin og P3.9 milyones ang Kapitolyo alang sa katukuran sa duha ka school buildings nga adunay tag duha ka classrooms.
Kini mahimutang sa Anislag Elementary School sa Lungsod sa Pinamungahan ug Biasong Elementary School sa Lungsod sa Balamban.
Niadtong Lunes ang hunta probinsiyal nipalabang og resolusyon nga nagtugot kang Gobernador Hilario Davide III sa pagpirma sa kontrata tali sa Megablue Konstrak Corporation alang sa katukuran sa nahisgutang school buildings ug kini humanon sulod sa 67 ka adlaw.
Ang resolusyon gipangamahanan ni Bokal Jerome Christian Librando, chairman sa committee on infrastructure.
Nasayran nga ang Kapitolyo adunay gahin nga P90 milyones alang sa katukuran sa mga classrooms sa tibuok probinsiya karong tuiga diin lakip niini ang P60 milyones sa niagi pang tuig.
Si Bokal Christopher Baricuatro nibutyag nga gibana-banang kapin sa 1,000 pa ka classrooms ang kuwang sa elementarya sa probinsiya.
Karong tuiga kapin sa 40 ka classrooms ang gikatakdang ipatukod sa probinsiya diin 15 niini ang gikatakdang sugdan karong buwana. (BANAT NEWS)