CEBU, Philippines - Gibuksan na ang bag-ong sanitary landfill sa dakbayan sa Toledo nga nahimutang sa Barangay Puting Bato ug gisugdan na sa Public Services Division ang paglabay sa ilang makolekta nga basura sa matag barangay.
Nasayran nga aduna nay Environmental Compliance Certificate ang landfill gikan sa Department of Environment and Natural Resources.
Si Konsehal Sozimo Abellanosa, vice chairman sa Committee on Environment and Natural Resources, mapasalamaton kay mahatagan na og sulbad ang taud-taud na nga problema sa siyudad sa paglabay sa mga basura.
Giawhag nila ang mga kapitan sa pag-abag pinaagi usab sa pag-awhag sa katawhan sa ilang tagsa-tagsa ka barangay sa paglain-lain sa ilang mga basura o pagpatuman sa garbage segregation.
Ang Puting Bato Landfill maoy ikaduha nga landfill sa probinsiya sa Sugbo nga adunay Environmental Compliance Certificate gawas sa landfill sa lungsod sa Consolacion. - /RUB) (BANAT NEWS)