CEBU, Philippines - Nasikop ang usa ka ex-convict human iyang gipasingitan ang barangay kapitan sa Pooc, Siyudad sa Talisay samtang nagtan-aw kini og basketball sa ilang lugar.
Si Kapitan Bernard Balorio niila sa suspek nga si Renerio Calma Jr., 36-anyos, minyo.
Asoy pa niya nga makadaghan na siyang gipasingitan ni Calma apan wala lang niya kini panumbalinga tungod kay nahibawo na siya nga musuol kini matag sabog sa ginadiling drugas.
Apan wala na siya kaagwanta niini samtang nagtan-aw siya sa nagduwa og basketball dihang nagsige og labay-labay sa iyang atubangan si Calma nga nagdala og hait nga hinagiban.
Si PO2 John Xyros Ilustrisimo sa Talisay City Police Station niingon nga nitawag si Kapitan Balorio kanila hinungdan nga ilang gisikop ang suspek kinsa nakuhaan og kabilya nga talinis ang tumoy.
Sumala pa ni Balorio nga nangayo og pasaylo kaniya ang kabanay sa suspek apan wala na siya’y mahimo tungod kay gipasakaan man gyud og kaso sa kapolisan si Calma.
Giingong manggamitay og drugas si Calma ug gani natanggong na kini gumikan sa ilegal nga kalihukan ug bag-o lang siya nga nakagawas gikan sa prisohan.
Gipetisyonan na sab ang suspek sa iyang mga silingan tungod kay hasol kini sa ilang lugar ilabi na kun makagamit og ilegal nga drugas. (BANAT NEWS)