Shabu gikan China nasakmit

CEBU, Philippines - Usa ka kilo nga shabu ang nasakmit sa mga sakop sa Philippine Drug Enforcement Agency (PDEA)-7 gikan sa gihulagway nga supplier og drugas sa Dakbayan sa Lapu-Lapu atol sa buy-bust operation diha sa Brgy.  Agus, Lapu-Lapu City, pasado alas 3 niadtong nakalabay nga hapon.

Ang dinakpan giila nga si Rogelio Romo, 56, minyo nga nagpuyo sa maong dapit.

Ang director sa PDEA-7, Yogi Ruiz nga nahinabi sa mga tigbalita miingon nga ilang nasikop si Romo human sa pipila ka adlaw nila nga pagpaniid sa ilegal niini nga kalihokan.

Gamit ang P300 mil nga budol money nakapalit og usa ka dakong putos sa gituohang shabu ang asset sa PDEA nga mitimbang og 100 gramos hinungdan nga kini gisikop sa mga operatiba. Narekober sa mga ahente gikan sa suspek ang usa ka kilo nga shabu nga gisulod sa Tsa-a nga dunay ngalan nga Guanyinwang Refined Chinese Tea nga dunay kantidad nga P6 Milyones.

Si Ruiz miingon nga “big time” nga drug supplier si Romo ug nagkuhaan kini og drugas direkta sa nasud sa China. Ang nakuha nga shabu gisulod sa tea bag nga selyado ang tabon.

Gumikan niini plano ni Ruiz nga ilang ipakatap sa uban nga buhatan ang maong paagi sa pagpalusot sa drugas nga gipaagi sa mga tsa, aron mas dali kini nga nahibaw-an kung ipalusot sa nasud.

Si Ruiz miingon apil ang Dakbayan sa Mandaue sa gisuplayan og drugas ni Romo.  Gawas sa mga nakuha nga shabu, nakuha usab ang 170 ka mga bala sa M16 Armalite Rifle.

Gawas kang Romo nadakpan usab silang Emar Anthony Zapra ug usa ka minor de edad atol sa operasyon sa Poblacion 2 sa Dakbayan sa Tagbilaran, samtang gipangita ang ilang kauban nga naila sa pangalan nga Dax Robante kinsa  nakaeskapo.  Upat ka gramo sa gidudahang shabu ang nasakmit gikan kanila.

PDEA Augmentation

Sa laing bahin, gipahibalo ni Ruiz nga sa sunod bulan mapun-an na unya ang sakop sa PDEA-7 human nga adunay 400 ka mga bag-ong mga agents gikan sa PDEA Academy ang idugang dinhi sa Central Visayas.

Si Ruiz miingon nga kung maabot na ang maong mga agents kini ipang-destino sa nagkalain-laing probinsiya sa Central Visayas.

Aminado si Ruiz nga kulang gayod sila sa tawo apan wala sila mabalaka niini kay target sa ilang buhatan dili lang gidaghanon sa mga mahimo nila nga operasyon kun dili sa mga kalidad sa ilang mga mahimong kalampusan.

“Dili kinahanglan padaghanay but the quality of the operation,” saysay pa ni Ruiz. (BANAT NEWS)