CEBU, Philippines - Gisugdan na sa komitiba sa City Pilgrimage kanhi gitawag kaniadto og Devotee City ang pagtukod sa kapuy-an sa mga dayo nga deboto sa Senyor Sto. Niño nga way kapasilongan dinhi sa dakbayan apan gusto nga motambong sa pangilin.
Ang maong kapuy-an sa mga dayo anha gibutang duol sa Compaña Maritima nga gisugdan og tukod niadtong adlaw nga Biyernes.
Sa usa ka phone interview, ingon ang chairman sa Devotee City committee nga si Roberto Cabarrubias nga sugod karong adlaw nga Huwebes manawat na sila og mga deboto gikan sa lagyong lugar sama sa Leyte, Siquijor, ug Negros.
Moabot ang mga mopuyo sa Devotee City ini’g Biyernes gikan sa mga lain-laing lungsod sa Sugbo nga molapas sa Danao City sa norte, ug sa Carcar City sa south.
Usa sa mga miyembro sa komitiba niingon nga 90 percent sa mga mopuyo sa Devotee City kay gikan ra sad sa probinsya sa Sugbo.
Matud pa ni Cabarrubias nga butangan nila og mga showerheads, portalets ug mga abuhan ang matag container van nga gihimong puloy-anan.
Adunay 24 ka portalets nga gihatod gahapon sa buntag ug dugangan pa kini.
Aron sigurado ang seguridad sa mga mopuyo sa Devotee City, 24/7 nga adunay magbantay nga mga polis nga naka-uniporme.
Ang siyudad nigamit og 120 ka mga container vans nga makapasilong og kwatro mil ka tawo.
Kadtong gusto nga mopuyo sa lugar, ipakita lang ang ilang tiket sa bus o sa barko ini’g rehistro isip ilang pamatuod nga gikan gyud sila sa layong dapit. (BANAT NEWS)