CEBU, Philippines - Giawhag ni Bise Mayor Edgardo Labella ang mga taxi drivers sa Dakbayan sa Sugbo nga morespeto gyud sila ngadto sa mga pasahero ug dili ilaron aron makabayad og dakung plitehan.
Gihimo ni Labella ang awhag dihang nidiskurso siya atubangan sa mga 800 ka taxi drivers nga nagpahigayon og Christmas Party sa niaging semana ubos sa pagdapit ni Chiquito Obeso, ang tag-iya sa Spider, Scorpion ug Airland Taxi.
Matud ni Labella nga suod niyang higala si Obeso ug matag higayon nga magpahigayon kini og Christmas Party sa iyang mga taxi drivers dapiton gyud siya ug pahatagon og mensahe.
“Ako gyud nga gitudloan ang mga taxi drivers sa mga maayong pamatasan ug ang pagsunod gyud sa traffic rules. Napulo na kini ka tuig namo nga gihimo ni Kito,” matud ni Labella.
Sa iyang mensahe, giawhag ni Labella ang mga taxi drivers nga kinahanglang batonan nila ang pagka-matinud-anon, matinahuron ug morespeto gyud sa ilang mga pasahero ilabi na ngadto sa mga langyaw.
Nakadawat og report si Labella nga adunay mga taxi drivers nga kusog kaayong “manglubag” kon mohimo og mga pagpanikas ngadto sa ilang mga pasahero ilabi na kun langyaw aron makabayad kini og dakung plitehan.
Gipasabot sa bise mayor ang mga taxi drivers nga makahatag og bati nga dungog kanila kun mohimo sila og pangabuso batok sa ilang mga pasahero. Samtang matud ni Labella nga kinahanglang motuman gyud ang mga taxi drivers sa lagda sa tukmang pagmaneho. -/GMR (BANAT NEWS)