CEBU, Philippines - Padayon nga gipaubos sa post-qualification evaluation ang nag-inusarang qualified bidder sa pagpalit sa P250 milyones nga heavy equipment sa Kapitolyo.
Gisusi sa Bids and Awards Committee ang mga dokumento sa joint venture sa ConEquip Philippines ug RDAK Transport.
Matud ni Atty. Mark Tolentino, pangulo sa BAC, nga wala nay niduso sa ilang motion for reconsideration nga ubang bidders nga wala ni-qualify.
Si Tolentino nagkanayon nga sa post-qualifications, tan-awon sa BAC kung aduna bay kapasidad ang bidder nga makahatag o supply sa mga ekipo nga gikinahanglan sa Kapitolyo.
Dugang niya nga apil nga ilang tan-awon mao ang specifications kun nasubay ba sa gipangita sa Kapitolyo. Si Tolentino nagkanayon nga apil usab nga tan-awon sa BAC ang dokumento sa joint venture sa ConEquip ug RDAK.
Tinguha nila nga mahuman na ug ma-award na sa dili pa matapos ang tuig o kaha sa sayong bahin sunod tuig. (BANAT NEWS)